Eventu ida-ne’e marka momentu importante ba komunidade agrária, ne’ebé hala’o husi Farmer Field and Business School (FFBS) — programa formasaun agrikultura nian ne’ebé implementa hamutuk husi MAPPF (Ministeriu Agrikultura, Peskas no Floresta) no Care Timor-Leste.

Iha serimónia ne’e, Sekretáriu ba Planeamentu Munisipal Ainaro, senhor Albertino Diaz Araújo, hatete katak prezensa autoridade ho parseiru sira iha fatin ne’e mak hatudu apoio moral no polítiku ba agrikultór sira iha Bibiliku. Nia agradece ba parte sira hotu ne’ebé kontribui atu loron ida-ne’e bele realidáde, no enfatiza importancia atu kontinua programa agrikultura sustentável atu sustenta familia, komunidade, no programa merenda eskolar.

“Ita nia komunidade la tenke depende deit ba apoiu, maibé tenke halo esforsu atu kontinua produz, tanba produsaun agrikultura mak sustenta familia no programa merenda eskolar,” dehan senhor Albertino.

Iha parte seluk.

Diretora Programa Care Timor-Leste, Marcelina Pasaribu, esplika katak FFBS hanesan “eskola lapangan” ba agrikultór sira atu hasae konhesimentu, habilidade, no kapásidade iha hortikultura, hamutuk ho orientasaun kona-ba maneju negosiu ki’ik. Programa ne’e mós lori iniciativa “saving and loan” (asosiasaun simpan-pinjam) atu ajuda agrikultór sira iha parte finanseiru.

“Objetivu FFBS mak atu hasae skill no konhesimentu agrikultór sira atu produz hortikultura diak, ne’ebé liga direta ho nutrisaun komunidade no programa merenda eskolar,” dehan senhora Marcelina.

Benefisiáriu grupu modernu agrikultura iha Biulicu, senhor Angelino Almeida Saimos, mós partilha esperiénsia hosi grupu sira ne’ebé implementa hela pratika agrikultura modernu. Nia hatete grupu sira agora iha 15 membru (feto no mane) ne’ebé prodús hela tomate, afarina, no produtos hortikultura seluk, parte hosi kontribuisaun ba merenda eskolar.

“Ami hahu iha 2023 ho apoiu husi Care no Ministeriu Agrikultura. Agora ami iha produsaun diak, benefisiu ekonomiku, no ami bele kontinua atu sustenta familia,” dehan Angelino.

Programa FFBS iha Ainaro sei remata iha Dezembru 2025, no Care Timor-Leste sei kontinua implementa ativídade hanesan ne’e iha munisípiu Ermera.

Eventu Loron Agrikultór ne’e mos hatudu rezultadu positivu husi kooperasaun entre Governu, organizasaun internasionál, no komunidade lokál iha esforsu kolektivu atu dezenvolve agrikultura sustentável iha Timor-Leste. Ekipa DMEA