Ministru MAPPF akompaña Vice PM hanesan mós MDRHC Entrega Ró Unidade 16 ba Peskadór iha Suai Loro
Covalima- 26/07/2025, Ministru Agrikultura Pekuária no Floresta Marcos “MAMETA” da Cruz akompaña Vice 2 Primeiru Ministru (PM) hanesan mós Ministru Dezenvolvimentu Rurál Habilitasaun Comunitaria (MDRHC), Sekretário Estadu Floresta (SEF) Fernandino Vieira entrega Ró ho unidade 16 ba peskadór atu bele apoiu atividade peskadór sira hodi kaer ikan iha Suku Suai Loro Postu Administrativu Suai Vila.
Iha entrevista Vice 2 Primeiru Ministru (PM) Ministru Dezenvolvimentu Rural Habilitasaun Comunitaria (MDRHC) Mariano Assanami Sabino hateten, governu liu husi Ministériu Dezenvolvimentu entrega Ró atu fasilita peskadór sira, governu nafatin iha liña koordenasaun ho departamentu peska Agrikultura Municipal nian atu bele tau matan no halo manutensaun diak atu ba peskadór sira bele uza Ró ne’e hodi bele kaer ikan.
Membru Governu ne’e informa, Orsamentu ba sosa Ro hirak ne’e mai husi programa apoiu komunidade nian ne’ebé mak liu husi tranferensia públiku, totál orsamentu mak $. 40 mill no Ró hirak ne’e fahe ba grupu ha’at no dadaun ne’e Ró iha Grupu sira nia liman ona, sira tenki koordena ho Departementu Peskas Agrikultura Municipal nian tanba ne’e MDRHC la servisu mesak maibé servisu Integradu.
Iha fatin hanesan Ministru MAPPF Marcos “Mameta” da Cruz hatutan, planu husi MDRHC mak sosa Ró ho unidade 16 hodi entrega ba peskadór sira tanba husu ba peskadór sira, tenki organiza a’an hodi servisu diak, Ró hirak ne’ebé mak simu ona labele para de’it tenki halo atividade peskas.
Ministru mós husu ba peskadór sira atu kaer ikan karik fa’an ho folin ne’ebé baratu ba komunidade sira seluk atu sosa, labele fa’an ho folin ne’ebe mak bo’ot ka as. Tanba ne’e husu ba peskadór sira atu.
Nune’e mos reprezentante PAM Covalima, Filomeno Cardoso hatete, tinan ida ne’e komunidade peskadór husi Munisípiu Covalima sorte diak tebes tanba bele hetan tan Ró husi Governu tanba ne’e husu ba peskadór sira atu utiliza didiak ekipamentus hirak ne’e.
Portantu Ró ho unidade 16 ne’e grupu benefisiariu ha’at mak sei asesu, Ro hirak ne’e ofisialmente entrega husi Vice 2 Primeiru Ministru (PM) Ministru Dezenvolvimentu Rural Habilitasaun Comunitaria (MDRHC) Mariano Assanami Sabino, akompanha mos husi Ministro MAPPF, SEF, Vice Ministra MMSI, Vice Ministro MOP, Diretor Jeral, Diretor Nasional xefe Departementu MAPPF nian iha tasi ibun Suai Loro. (ekipa DMEA)
