Natar ne’ebé abandona iha Uatucarbau hahú reativa fali

Viqueque-10/08/25, Diretór Nasionál Agrikultura Hortikultura Protesaun das Plantas hamutuk humutuk ho APA Uatucarbau foin lalais ne’e vizita natar hamutuk 50 ektare iha Haioli hodi hare direita produsaun hare ne'ebé mak produz husi agrikultór sira tanba iha tinan barak nia laran natar balun abondona maibé tinan 2025 hahu reativa fila-fali iha Postu Administrativu Uatucarbau.

Iha entrevista Diretór Nasionál Agrikultura Hortikultura Protesaun das Plantas Lúcio Nuno esplika, objetivu vizita natar Haioli ne’e atu hare katak área natar ne'e Agrikultór sira halo de’it iha tinan 2011 tanba intek irrigasaun hetan estragus ka at, entaun agrikultór sira la halo natar. Iha tinan 2025 ne'e mak MAPPF liu husi Diresaun Nasionál Irrigasaun orienta ekipamentu eskavadór mai halo normalizasaun kanu ne'ebé a’at no agora natar balun hahu ativa fali no rezultadu mak ohin Ekipa mai hare direita ne'e.

Diretór ne'e haktuir, rezultadu husi produsaun ne'e diak tebes tanba hare ne'ebé mak agrikultór sira kuda iha natar ne'e ho variedade nakroma, impare 24, ne'ebé agrikultór sira halo misturasaun hodi kuda iha natar Haioli ne'e no ba oin rezultadu bele fa’an.

Iha fatin hanesan, Administradór Postu Administrativu Uatucarbau Anacleto Doutel Sarmento hatete, liu husi prosesu konstrusaun ba Irrigasaun Haioli sira halo proposta ba MAPPF liu husi Diresaun Nasional Irrigasaun hodi destaka ekipamentu eskavadór ba iha natar Haioli tanba Autoridade lokál ho komunidade agrikultór sira mobiliza hodi hasai hotu ai-horis ne'ebé mak nakonu iha toos laran atu nune'e agrikultór sira bele halo fali natar.

Autoridade lokál ne'e husu mós ba parte Governu liu-liu MAPPF atu bele kanaliza sistema Irrigasaun ne'ebé iha atu nune'e ba futuru komunidade agrikultór sira bele halo toos ho natar atu nune'e tinan ida bele halo kolleta dala rua nune’e ba oin bele fó sustentabilidade ba agrikultór sira ne'ebé durante halai natar iha fatin refere.

Atividade ne'e hetan partisipasun maximu husi, Xefe Departementu husi Nasionál, Autoridade lokál Uatucarbau, Extensionista nomós agrikultor natar sira. Ekipa DMEA.