Viqueque- 12-08-2025- Ministério Agríkultura Pekuária Peskas no Florestas (MAPPF) hamutuk ho Prezidente Autoridade Municipál Viqueque kolleta jerál hare variedade nakroma ektare 58 iha Aldeia Buanurak Suku Uabubu Postu Administrativu Ossu Munisipiu Viqueque.

Iha serimónia kolleta ne’e, reprezenta Ministru MAPPF Atual Diretór Jerál Agrikultura Kafé Plantas Industia, Martinho Laurentino Soares esplika serimónia kolleta hare variedade nakroma hamutuk ektare 58 ne’ebé implementa ho sistema Prátika Agríkultura Diak (PAD) hatudu rezultadu diak. “Ohin ita hamutuk ho agrikultór sira hodi kolleta hare nakroma iha natar Futudo Buanurak ne’ebé abandona kuaze tinan naruk maibé iha tinan ida ne’e MAPPF apoiu hadia kanál irrigasaun, fahe tratór hodi halai natar no apoiu fini ba agrikultór sira kuda,” Martinho Laurentino Soares hateten ba Jornalista sira hafoin remata kolleta hare iha natar Futudo.

Diretór Jerál ne’e profunda, natar ne’e halo hetan asistensia husi estensionista suku sira hamutuk ho agrikultór sira hodi implementa PAD ho rezultadu hare ne’ebé diak tebes, ho resultadu ne’ebé iha, komunidade sira iha area ne’e bele iha ai-han liu-liu konaba fós, ho polítika governu nian Ministériu hein katak natar ne’e ba oin liu husi apoiu servisu agrikultura iha Munisipiu Viqueque nafatin fo apoiu ba komunidade agrikultór sira iha ne’e, hodi nune’e natar labele abandona tanba natar ne’e desde uluk Indonesia nia tempu iha area ida ne’e kada tinan emasempre halo natar, ita hein katak agrikultór sira nafatin iha vontade atu bele produz hare, kuda modo, kuda batar no hahan ne’ebé komunidade sira presiza.

Iha fatin hanesan Prezidente Autoridade Municipal Viqueque, Francisco C. S de Gonzaga Soares informa, Rezultadu husi atividade kolleta ne’e positivu los ne’eduni ba oin bele fo esperansa ba povu agrikultór sira liu-liu sira ne’ebé mak iha natar potensia ba agrikultura, tanba natar futudo ne’e iha tinan naruk nian laran abandona kuaze tinan sanulu - resin (10) tanba ne’e ba oin nu’udar Autoridade motiva inan-aman agrikultór sira liu husi fasilita ekipamentu sira hodi loke irrigasaun tama ba natar sira no sira mós iha vontade hodi halo natar no ohin Ministériu hamutuk ho autoridade sira bele mai kolleta nia rezultadu.

PAM reafirma, dezenvolvimentu iha setór agrikultura ne’e importante tebes tanba ita hakarak lori bem estar povu nian liu-liu ba natar no to’os na’in sira iha munisípiu Viqueque, iha tempu badak mós PAM sei organiza grupu joventude iha postu sira atu bele halo to’os no natar, tanba MAPPF sei fo ekipamentu sira ne’ebé mak iha hodi fasilita agrikultór sira nia servisu iha tereinu hodi loke natar sira ne’ebé mak sei abandona hela atu bele kuda hahan sira ne’ebé mak ita han no bele fa’an ba iha merkadu hodi bele sustenta nesesidade familia uma laran.

Nune’e mós reprezentante Agrikultór Buanurak, Manuel Afonso da Costa Guterres sente kontete tanba tinan ida ne’e MAPPF apoiu Fini, ekipamentu Tratór no adubus organiku no rezultadu bele kolleta, ba oin agrikultór sira presija nafatin MAPPF nia nia tulun atu bele motiva nafatin sira hodi bele halo nafatin toos ho natar tuir matadalan ne’ebé mak iha, liga ba irrigasaun governu halo ona maibé seidauk hotu.

Agrikultór sira nafatin husu MAPPF atu bele kontinua halo irrigasaun to’o hotu atu nune’e sira bele halo natar natafin, tanba natar ne’ebé agora daudaun sira halo ne’e ektare 58, liu husi rezultadu ne’ebé mak sira hetan atu bele sustenta sira nia nesesidade familia.

Iha Serimónia kolleta hare ne’e hetan partisipasaun husi Diretór Nasional, Diretor Municipal, Administradór Postu, Autoridade lokál, Xefe Departementu, Agrikultór sira no hetan seguransa maximu husi Komandu PNTL Munisipiu Viqueque. Ekipa DMEA