Dili-Ministériu Agrikultura Pecuaria pesca no Floresta (MAPPF) asina Memorandu Of Understanding (MoU) ho Parseiru dezenvolvimentu Catholic Relief Services (CRS) konaba oinsa produs lalar metan ba hahan Ikan. MoU refere ofisialmente asina husi Ministru MAPPF Marcos “Mameta” da Cruz no durasaun ba MoU ne’e tinan ida. Atividade ne’e realiza iha Loron Tersa (11/11/25) iha Salaun Uma Adat Comoro

Iha entrevista Sekretario Estadu Peskas, Domingos da Conceição “Macaro”, hato’o nia agradese ba inisiativa husi Parseiru CRS ne’ebé mak hakarak koopera diak ho MAPPF. Kooperasaun ne’e importante tebes, liga ba atividade aquicultura nian, durante atividade Aquicultura ka hakiak nain sira enfrenta tebes problema hahan Ikan, nune’e hahan Ikan ne’ebé mak importa ninia presu mós karun tebes, no dalabarak konsentra de’it iha kapital la konsegue destribui ba to’o iha area rural sira entaun difikulta tebes hakiak na’in sira.

SEP akresenta, komunidade hakiak nain sira, iha vontade atu hakiak Ikan, maibe dezafiu mak hahan Ikan ne’eduni ho programa CRS nian ne’ebé hakiak lalar metan bele sai hanesan ai-han ne’ebé mak bele substitui ai-han importadu hanesan pellet, ida ne’e pasu ida ne’ebé mak diak tebes, tanba bele fasilita hakiak nain sira. Mesmu ho volume ne’ebé ki’ik, maibé hahú husi ki’ik ne’e bele sai bo’ot.

“Atividade refere hala’o iha Munisipio Viqueque, hau rasik ba observa diretamente, hau hare katak programa ne’e diak tebes, no agora espanda tan ona ba Munisipio Baucau, entaun ida ne’e bele loke ona espasu ne’ebé mak pozitivu ba ita nia komunidade hakiak nain sira bele asesu, ao mesmo tempu sira mós bele iha koñesementu atu bele dezenvolve lalar metan ne’e ba aihan Ikan.”tenik SEP

Iha fatin hanesan, Country Manager CRS Yane Tamonob Pinto esplika, CRS asina akordu ho MAPPF atu bele suporta hakiak na’in sira iha Munisipiu ne’ebé  sei determina atu bele fo treinamentu ka kapasitasaun ba to’os nain sira ne’ebé hakarak hakiak Ikan, hanesan alternativu ba hahan uma laran nian iha parte oinsa bele produs ba hahan Ikan.

“Ita hatene katak ita nia to’os nain sira durante ne’e hasoru problema wainhira atu asesu ba hahan Ikan hanesan pellet, liu husi Teknolojia ou aprosimasaun ne’ebé CRS halo hela iha grupu tarjeitu, ami mos fo treinamentu ba to’os nain sira konaba oinsa hakiak lalar metan, ne’e hanesan alternativu ba hahan Ikan nian ne’ebé baratu no mós bele hetan iha sira nia uma sorin, ne’ebé la presiza hasai osan, sira presiza servisu maka’as konsisten no komitmentu ba iha produs hahan ikan nian  de’it.” Katak Yane

Nia informa, CRS komesa ninia projeitu pilotu iha Munisipio Viqueque no Baucau ho grupu pilotu uma kain 20, kada uma kain sira halo kolan rua ou tolu bazeia ba sira nia forsa, hanesan ita hatene katak sira halo ida ne’e manual, entaun buat sira ne’e mak sira halo hela. Ne’e hanesan Pilotu, CRS mós sei esforsu atu habelar atividade pilotu ne’ebé mak sira halo ona ba iha Munisipio seluk. fiar katak ho kolaborasaun ka asina akordu ho MAPPF sei bele atinji liu tan ema barak ninia suporta sir aba atividade refere.

Portanto seremonia asina MoU ne’e partisipa husi Ministro MAPPF, Secretario Estadu Pescas, Country Manager CRS, Diretór Geral Pescas no mós Funsionario tekniku husi Dirasaun Jeral Pescas nian. (Ekipa DMEA)