Dili, 16 Abríl 2026 – Ministru Agrikultura, Pekuária, Peskas no Florestas (MAPPF), Eng. Marcos”MAMETA” da Cruz MAgSt realiza enkontru ho parseiru dezenvolvimentu sira ne’ebé hala’o servisu iha Timor-Leste ligadu ho atividade servisu iha setór Agrikultura, Pekuária, Peskas no Florestas.

“Ohin ita hasoru malu ho parseiru sira ne’e, ita atu reforsa koordenasaun entre autores sira ne’ebé ligadu husi Ministériu Agrikultura hanesan instituisaun Governu nian ne’ebé lidera dezenvolvimentu iha setór haat atu iha koordenasaun ho parseiru sira ne’ebé hala’o servisu iha setór haat ne’e”. dehan Ministru Marcos bá jornalista sira iha salaun enkontru Ministériu Finansas Aitarak laran kuinta ne’e.

Ministru Marcos MAMETA dehan iha enkontru harmonizasaun ne’e sei halo mós dizkusaun ho parseiru dezenvolvimentu sira, ida-idak sei fó sira nia hanoin durante tinan ida liubá, parseiru sira halo saida no MAPPF halo saida. Depois mak iha servisu balun mak ninia implementasun la di’ak karik husi parte ne’ebé tenke buka hadi’a.

“Ohin ha’u mós ko’alia konabá servisu ne’ebé durante ne’e la’o ona, kapás, koordenasaun la’o di’ak, ida-idak ho impaktu posetivu bá dezenvolvimentu iha setór Agrikultura, Ortikultura, Pekuária, Peskas no Florestas”, tenik Ministru

Ministru hatutan liutan katak iha ezemplu servisu dezenvolvimentun ida ne’ebé parseiru dezenvolvimentu sira halo ona mak iha aquikultura ka peskas nian, ne’ebé iha interese ema nian atu konsumu ikan husi 6.1 kilograma iha 2012 no agora sa’e ona bá 8.7 kilograma. Ne’e hatudu katak iha progresu ida ne’ebé di’ak.

Maibé iha mós parte Agrikultura nian purizemplu persiza iha koordenasaun iha nivel hotu-hotu husi leten bá to’o nivel kraik inklui ho Prezidente Autoridade Munisípiu sira. Tanba iha implementasun balun iha distribuisaun traktores sira hanesan hands traktor iha fatin balun hanesan Viqueque no Covalima seidauk iha koordenasaun di’ak.

Tanba ne’e maka liuhusi enkontru harmonizasaun ne’e buka atu reforsa koordeansaun di’ak entre MAPPF ho parseiru dezenvolvimentu sira, atu nune’e iha tinan ida ne’e bele hadi’a saida de’it mak la dun di’ak. Nune’e atividade sira ne’e bele fó benefisiu direta bá povu sira hodi hetan redimentu atu hadi’a sira nia moris.

Iha fatin hanesan Embaixadór Japaun mai Timor-Leste Yamamoto Yusushi apresia tebes ho inisiativa Governu Timor-Leste nian liuhusi Ministériu Agrikultura Pekuária, Peskas no Floresta halo ona hodi konvoka enkontru ida ne’e ho parseiru dezenvolvimentu sira. Atu iha nafatin liña koordenasaun di’ak hodi bele servisu hadi’a setór haat ne’ebé importante iha Timor-Leste.

“ha’u konsidera enkontru ne'ebé susesu tebes ohin loron tanba agrikultura iha setór importante sira. ha'u hein katak, bazeia bá dizkusaun ohin loron nian no Ministeriu Agrikultura, lidera husi Ministru nia lideransa sei kontinua servisu nafatin ho ami atu apoiu dezenvolve setór Agrikultura, Pekuária, Peskas no Florestas iha timor sai di’ak liutan”. Tenik Yamamoto

Yamamoto afirma liutan katak ninia parte iha nafatin kooperasaun di’ak bá setór Agrikultura no Peskas liuhusi buat ne’ebé sira suporta. Iha buat barak maka presiza atu halo liutan. Tanba ne’e lori governu japaun nian naran hakarak hateten katak kooperasaun di’ak ne’ebé japaun halo ona ho Governu TL liuhusi MAPPF, mak iha buat balun seidauk halo ho di’ak, sira sei halo esforsu atu hadi’a hodi nune’e bá oin bele sai di’ak liutan hodi lori moris di’ak bá povu timoroan tomak

Iha enkontru harmonizasaun ne’e hetan mós partisipasaun husi Sekretáriu Estadu Peskas, Sekretáriu Estadu Pekuária, Emabixadora Estadu Unidus Amerika mai Timor-Leste, Reprejentanmte grupu Banku Mundiál iha Timor-Leste, parseiru dezenvolvimentu sira, inklui dirijente sira husi MAPPF.